APAT NA ‘SURVIVOR STORIES,’ TAMPOK SA “SOCO” NGAYONG MAYO

Maraming krimen ang hindi nasusulusyunan dahil sa kawalan ng ebidensiya ngunit mayroon namang pambihirang pagkakataong nabubuhay ang mga biktima nito para maging susi sa paglutas nito. Itatampok ni Gus Abelgas sa "SOCO: Scene of the Crime Operatives" ang apat na "survivor stories" o mga krimeng may pag-asa pang masolusyunan dahil sa mga biktimang nakaligtas sa mga ito tuwing Biyernes ngayong Mayo.

Ngayong Biyernes (Mayo 4), masasaksihan ang kaso ng dalawang magkaibang baklang pinagtangkaang patayin ng isang lalaking lasing. Himalang nakaligtas ang isa sa kanila na siyang naging susi upang bigyang hustisya ang nangyaring krimen.

Ilalahad naman sa Mayo 11 ang kwento ng magkakababatang dumanas ng marahas na hazing session sa isang fraternity kung saan ang isa sa kanila ay nabuhay habang ang isa nama'y napaslang at isinilid sa drum ang bangkay na iniwang palutang-lutang sa Pasig River.

Samantala, panggagahasa at pagpatay sa isang dalaga ang iimbestigahan ni Gus sa Mayo 18 kung saan nagkunwaring patay ang kapatid ng biktima matapos silang paghahampasin ng suspek. Ngunit dahil walang magawa, napanood niya ang karumaldumal na panghahalay sa kanyang kapatid ng kanilang kapitbahay.

Isang car dealer agent naman ang muntikan nang mamatay matapos sakalin, suntukin, at saksakin ng taong bibili sana ng kanyang sasakyan. Maswerteng nabuhay ang biktima upang maisumbong pa sa mga pulis ang nangyari at patuloy itong susundan ng "SOCO" sa Mayo 25.

Samahan si Gus Abelgas sa paghahanap ng hustisya sa "SOCO: Scene of the Crime Operatives" bawat Biyernes ngayong Mayo, pagkatapos ng "Bandila" sa ABS-CBN o sa mas maagang pag-ere nito sa DZMM TeleRadyo (SkyCable Channel 26), 9:15 p.m.

By Night Owl || Full Story: Kapamilyanewsngayon