Jennifer Lopez, Jessica Sanchez magkakaroon ng concert sa Pilipinas

Kasalukuyang nasa plano ang pagpunta ng singer na si Jennifer Lopez sa Manila para sa isang concert at maaring makakasama niya rito ang American Idol runner-up na si Jessica Sanchez. Kinumpirma ito ng N91 Live productions CEO na si Jun Lorenz Mamangon sa nakaraang media gathering na naganap sa Bistro Filipino. Ito ay magiging parte ng world tour concert ni JLO kung saan makakasama niya rin ang Spanish-Filipino artist na si Enrique Iglesias.

Sa darating na November 24, 2012 ay inaasahang gaganapin ang kauna-unahang concert ni Jennifer Lopez sa Manila. Kung sakali namang matuloy ay ito rin umano ang unang pagkakataon ni Jessica Sanchez na makapunta sa bansa ng kaniyang ina. Sa Amerika na lumaki ang dalaga at sinabing hindi pa nakakauwi ng Pilipinas pero nasa plano na raw ito ng kaniyang pamilya.

Inimbitahan umano ng mga producers si Jessica Sanchez para maging front-act sa naturang concert ni Jennifer Lopez na kilala bilang judge ng sinalihang singing contest ng dalaga na American Idol. Ang naturang concert ni JLo ay maaaring gawin sa concert grounds ng SM Mall of Asia. Kahit hindi pa raw sigurado ang pagpunta ni Jessica bilang bahagi ng concert ay sinigurado naman ng mga producer na tuloy na tuloy na ang pagpunta ni Jennifer Lopez sa Manila. Halos isang taon at kalahati na nila itong pinag-uusapan bilang parte ng negosasyon. Naging maganda rin ang pakikipag-usap ng mga producers sa manager ni Jennifer  Lopez at kasalukuyang  gumagawa ng plano para makasama si Jessica Sanchez sa naturang concert.

Sapat na rin daw kahit dalawang kanta lang ang magmula kay Jessica dahil ikatutuwa na ito ng kaniyang mga naghihintay na Filipino fans. Matatandaang si Jennifer Lopez at mga kasamang judges ang gumawa ng paraan para hindi mapauwi si Jessica Sanchez kung kaya nagawa nitong maging parte ng Final 2 ng talent show. Makikita kay JLo ang lubos nitong paghanga sa 16-taong-gulang na si Jessica lalo na kapag nabibigyan ito ng mahihirap na kanta.

Abala si Jessica Sanchez sa pagpunta sa iba’t-ibang mga events matapos contest at sinasabing siya muna ang hahalili kay Phillip Phillips na kasalukuyang naghahanda sa kaniyang nalalapit na kidney surgery. Hindi rin sigurado ang ina ni Jessica kung kailan makakauwi ng Pilipinas ang kaniyang panganay  na anak dahil uunahin pa raw muna nito ang mga commitments sa Estados Unidos bago pa bumisita sa bansa ng ina. Pinasinungalingan naman ni Jennifer Lopez ang mga balitang hindi na siya magiging hurado sa susunod na season ng American Idol dahil hindi niya pa sigurado kung makakaya ito ng kaniyang schedule. Samantala, abala naman si Jessica Sanchez kasama ang iba pang finalist ng Idol sa nalalapit nilang concert tour.

Full Story @ Tsismoso